Bayern Munich ka bërë një qasje formale për të nënshkruar me sulmuesin dinamik të Atalantas, Ademola Lookman, duke propozuar një huazim me një tarifë të konsiderueshme dhe me opsion blerjeje për një shumë të lartë, sipas burimeve të afërta me marrëveshjen.
Sulmuesi 27-vjeçar i cili është shndërruar në një nga lojtarët më shpërthyes të futbollit evropian, është i hapur ndaj mundësive të reja dhe dëshiron të ndërmarrë hapin e radhës në karrierën e tij, me një largim nga Atalanta që duket gjithnjë e më i mundshëm.
Rruga e Lookman drejt afirmimit në Serie A ka qenë e jashtëzakonshme. Pas vështirësive për t’u konsoliduar në klubet angleze si Everton, Fulham dhe Leicester City, si dhe një periudhe në RB Leipzig, ai iu bashkua Atalantas për rreth 10 milionë euro në verën e vitit 2022.
Që atëherë, ai është shndërruar në një lojtar kyç për klubin nga Bergamo, duke regjistruar 17 gola dhe 10 asistime në 45 paraqitje gjatë sezonit 2023/2024.
Momenti i tij më i madh erdhi në finalen e Ligës së Evropës 2024, ku realizoi një het-trik historik në fitoren 3-0 ndaj Bayer Leverkusen, duke i dhënë fund serisë prej 51 ndeshjesh pa humbje të gjermanëve dhe duke i siguruar Atalantës trofeun e parë pas 61 vitesh dhe titullin e parë evropian në histori.
Formës së tij mbresëlënëse i ka qëndruar besnik edhe sezoni pasues, me 20 gola dhe shtatë asistime në 40 ndeshje, duke ndihmuar Atalantan të renditet në vendin e tretë në Serie A dhe të sigurojë kualifikimin për Ligën e Kampionëve 2025/2026.
Interesimi i Bayernit vjen në një moment kur gjigantët gjermanë po kërkojnë të përforcojnë repartin ofensiv, sidomos pasi Chelsea i njoftoi të shtunën se nuk do të vijojnë me huazimin e sulmuesit Nicolas Jackson, pavarësisht një marrëveshje të arritur më herët./Telegrafi/
