Sulmuesi brazilian i Real Madridit, Vinicius Jr., po kalon një periudhë vendimtare në karrierën e tij.
Pas humbjes së Topit të Artë në vitin 2024, një çmim që për shumëkënd dukej i sigurt për të, 24-vjeçari duhet të rikthehet si lojtari vendimtar që ishte dikur, shkruan Marca.
Kanë kaluar dhjetë muaj që kur Rodri u shpall fitues i Topit të Artë më 28 tetor, duke lënë Viniciusin pa trofeun e lakmuar.
Një goditje e rëndë për lojtarin dhe për vetë Real Madridin, që atë kohë reagoi me bojkot ndaj ceremonisë. Ironikisht, vetëm disa ditë më herët, pas një tregolëshi kundër Borussia Dortmund, Vini dukej favorit absolut për çmimin.
Por sezoni i fundit nuk i solli asgjë të mirë. Real Madridi fitoi vetëm dy trofe të vegjël nga shtatë të mundshëm, dhe dështimi kolektiv preku edhe Viniciusin.
Forma e tij ra dukshëm, dhe as këtë sezon ai ende nuk ka treguar versionin më të mirë të vetes.
Në ndeshjen e fundit ndaj Osasunës, protagonist ishte Kylian Mbappé, ndërsa Vinicius zhvilloi një paraqitje të zakonshme, i ndalur shpesh nga mbrojtja kundërshtare.
Zëvendësimi i tij nga trajneri Xabi Alonso, pavarësisht rezultatit të ngushtë, u pa si një sinjal i qartë.
Alonso i dha hapësirë Gonzalos, golashënuesit më të mirë të Kupës së Botës për Klube, kompeticion në të cilin Vinicius nuk shkëlqeu.
Ky vendim shihet si paralajmërim për brazilianin, i cili tashmë po ndien presionin nga alternativa të tilla si Gonzalo dhe Rodrygo.
Pavarësisht se vendi i tij në formacionin titullar nuk është ende në rrezik, tifozët e Real Madridit presin rikthimin e lojtarit që dikur ishte i pandalshëm – një Vinicius që terrorizonte mbrojtjet nga minuta e parë deri në të fundit.
Për momentin, kjo mbetet sfida më e madhe e tij. /Telegrafi/
