Renato Sanches është larguar nga Paris Saint-Germain për t’u bashkuar me Panathinaikosin në formë huazimi, kanë konfirmuar të dy klubet. Huazimi i mesfushorit portugez në Greqi nuk përfshin opsion blerjeje.
Sanches u rikthye te PSG këtë verë pasi kaloi sezonin e kaluar në huazim te Benfica, ku zhvilloi 21 paraqitje në të gjitha garat.
Megjithatë, ai nuk ka arritur të përshtatet në planet e trajnerit Luis Enrique dhe u vendos në grupin e lojtarëve të padëshiruar që pritet të largohen para mbylljes së afatit kalimtar.
Karriera e tij në "Parc des Princes" nuk ka shkuar sipas pritjeve. Prej transferimit nga Lille në vitin 2022 për 15 milionë euro, Sanches ka kaluar edhe periudha huazimi te Roma dhe Benfica, por pa arritur stabilitet.
Kontrata e mesfushorit portugez me PSG mbetet e vlefshme deri në vitin 2027, ndërsa në Panathinaikos ai shpreson të rifitojë formën e dikurshme.
Sanches kur u ble nga Bayern Munich para dhjetë vitesh, ishte një nga lojtarët më premtues në botë, ku u paguan 35 milionë euro, por ai asnjëherë nuk arriti të futet në mesin e më të mirëve, përkundër që fitoi shumë trofe./Telegrafi/
