Përzgjedhësi i Kosovës, Franco Foda, ka vlerësuar lartë Zvicrën dhe historikun e saj në turnetë e mëdha, por deklaroi se ekipi i tij është gati për këtë ndeshje.
Ai deklaroi se Kosova do të luajë lojë sulmues, për t'i kënaqur tifozët dhe për të marr rezultat pozitiv.
“Kemi pasur paraqitje të mira, por edhe Zvicra ka treguar lojë dhe rezultate të forta. Në takimet e mëparshme kemi qenë më shumë në mbrojtje, por këtë herë duam të tregojmë lojë më sulmuese, të bëjmë presion të lartë dhe të ruajmë topin me kurajë. Shpresojmë të marrim rezultatin më të mirë të mundshëm”, ka thënë fillimisht Foda.
Foda ka folur edhe për dy lojtarët që së fundmi iu janë bashkuar Kosovës, Leon Avdullahu dhe Veldin Hoxhën.
“Janë paraqitur shumë mirë në stërvitje dhe na ndihmojnë për përparimin e lojës. Mesfusha është themeli i futbollit tonë, dhe uroj të qëndrojnë sa më gjatë këtu. Ata do të kenë një të ardhme të ndritshme te Kosova” , deklaroi Foda.
Forma e mirë e Kosovës dhe rezultatet pozitive ndaj Zvicrës, janë disa arsye që priten që Dardanët të zhvillojnë lojë të mirë.
“Nuk mendoj se lojtarët e Zvicrës do të kenë frikë, sepse e dinë se janë një ekip i fortë, por do të kenë respekt për ne, ashtu siç do ta kenë edhe kundërshtarët e tjerë”.
“Kam dëgjuar që ka pasur atmosferë të mirë në ndeshjet ndërmjet Kosovës dhe Zvicrës. Kemi parasysh që do ta kemi sërish përkrahjen. Shpresoj të kemi sa më shumë shikues në anën tonë dhe do të jetë një detyrë që t’i kënaqim me lojë. Presim që të ndahen të kënaqur dhe do të luajmë me një stil më të hapur për t’i gëzuar tifozët”, përfundoi Foda. /Telegrafi/
