Mesfushori i Crystal Palaces, Eberechi Eze, nuk ishte aspak i kënaqur me një gazetar të Sky Sports gjatë stërvitjes së skuadrës këtë të mërkurë. Një episod i vogël, por që mori vëmendje të madhe në rrjetet sociale, tregoi tensionet që lojtari po përjeton mes thashethemeve të shumta për të ardhmen e tij.
Eze, 27 vjeç, prej javësh është përfolur për një transferim të mundshëm drejt Arsenalit ose Tottenhamit. Sidoqoftë, deri më tani ai mbetet pjesë e Crystal Palace dhe vazhdon përgatitjet me klubin, pavarësisht interesit të madh të treguar nga klubet e mëdha londineze.
Raportimet e fundit sugjerojnë se Tottenhami është gati të intensifikojë përpjekjet për ta transferuar atë. Sipas Fabrizio Romanos, presidentët Daniel Levy dhe Steve Parish janë në kontakt të drejtpërdrejtë për një marrëveshje që do të arrinte në 55 milionë paund, plus edhe 5 milionë të tjerë në forma bonusesh. Eze madje raportohet se i ka shprehur dëshirën Palace për t’u bashkuar me Spurs.
Përkundër kësaj, mesfushori nuk ka ndalur angazhimin e tij në fushë. Ai ishte titullar në barazimin pa gola kundër Chelseat në Stamford Bridge fundjavën e kaluar dhe vazhdon të stërvitet normalisht me shokët e skuadrës përpara ndeshjes së parë të play-off-it të Europa Conference League kundër Fredrikstad të Norvegjisë.
Gjatë stërvitjes së së mërkurës, kamerat e Sky Sports ishin të pranishme në kompleksin e klubit. Gazetari Gary Cotterill e përdori rastin për të komentuar me zë të lartë rreth së ardhmes së Eze dhe Adam Wharton, duke qenë vetëm pak metra larg tyre. Ky veprim nuk u prit mirë nga lojtari.
Në një moment, Cotterill tha me ironi se nuk do ta pyeste Whartonin për të ardhmen e tij. Pikërisht atëherë, Eze e shikoi drejt e në sy me një vështrim të ashpër, ndërsa Wharton reagoi duke treguar me gisht stemën e Crystal Palace në fanellën e tij – një gjest i qartë se dëshiron të fokusohet te skuadra aktuale.
Gazetari u mundua ta kalonte situatën me shaka, duke i thënë Eze “të pushonte pak” dhe duke shtuar se lojtari po përqendrohej vetëm te puna që kishte përpara. Megjithatë, reagimi i lojtarëve dhe mënyra si u zhvillua momenti nuk kaluan pa u komentuar në rrjetet sociale.
Shumë tifozë të Palace e kritikuan qasjen e Sky Sports, duke e cilësuar Cotterill si provokues. Njëri prej tyre shkroi: “Të është dhënë akses i hapur në stërvitje dhe ti e ke shfrytëzuar për të prishur fokusin e lojtarëve”. Ndërsa një tjetër shtoi: “Rrallë shikon tifozët e futbollit kaq të bashkuar për diçka – dhe këtë herë është për përbuzjen ndaj Gary Cotterill". /Telegrafi/
