Kosova ka kryer edhe stërvitjen e fundit para duelit të nesërm me Zvicrën, në kuadër të kualifikimeve për Kupën e Botës 2026.
Stërvitja në “St Jakob Park” është zhvilluar nën rrebeshin e shiut. Të gjithë lojtarët janë në gjendje të mirë dhe gati për ndeshjen e nesërme.
Përzgjedhësi Franco Foda, do t’i vuajë mungesat e Edon Zhegrovës dhe Milot Rashicës, që janë të rëndësishme, por ekipi ka treguar se mund të marrë rezultate pozitive edhe me mungesa të tilla, fakt janë fitoret ndaj Islandës.
Foda ka provuar dy rreshtime me lojtarë të ndryshëm në stërvitjet e fundit, duke provuar formacionin 4-4-2 dhe 4-2-3-1.
Në formacionin 4-4-2, në portë është Aro Muric, ndërsa para tij janë Mërgim Vojvoda, Amir Rrahmani, Lumbardh Dellova dhe Dion Gallapeni.
Në mbrojtje janë provuar edhe Fidan Aliti dhe Leart Paqarada, shkruan Telegrafi.
Para mbrojtjes dyshja e Bundesligës, Elvis Rexhbeçaj dhe Leon Avdullahu, ndërsa në krahë Ermal Krasniqi në të djathtë dhe Muharrem Jashari në të majtë. Dyshja në krahë kanë luajtur edhe në përballjet e shkuara me Fodën në këto pozita.
Pra përzgjedhësi e ka provuar sulmin me dy, Vedat Muriqin dhe Fisnik Asllanin.
Ky formacion në fazën mbrojtëse mendohet të jetë 4-5-1, me Asllanin që do të kthehej në të majtë të mesfushës, ndërs Jashari do të merre një pozitë më afër qendrës.
Po ashtu, Foda, ka provuar edhe formacionin 4-2-3-1, me rreshtimin e njëjtë në mbrojtje, por me Leart Paqaradën në të majtë.
Dyshja e mesfushës nuk ndryshon, ndërsa në vend të Asllanit është provuar si numër 10-të, Florent Muslija.
I vetëm në sulm do të ishte Vedat Muriqi, i cili mbetet rekordmen te Kosova sa i përket golave.
Ndeshja Zvicër –Kosovë zhvillohet nesër (e premte) në orën 20:45 në stadiumin “St Jakob Park” të Baselit. /Telegrafi/
