Alejandro Garnacho po kërkon largimin nga Manchester United gjatë kësaj vere, pavarësisht se ka kontratë me klubin deri në vitin 2028. 21-vjeçari nuk është i bindur për rolin e tij në skuadër dhe po shqyrton opsione të tjera.
Sipas "TBR Football", sulmuesi argjentinas ka zgjuar interes të madh në Ligën Premier, me tri klube që po ndjekin nga afër situatën e tij, Chelsea, Aston Villa dhe Tottenham Hotspur.
Chelsea është klubi më i avancuar në garë, dhe ka nisur kontaktet për të siguruar një transferim të bujshëm, duke e konsideruar Garnachon pjesë kyçe të projektit të tyre të ri.
Edhe Aston Villa ka hyrë në garë, me klubin nga Birmingham që synon të forcojë repartin ofensivë për sezonin e ardhshëm dhe e sheh argjentinasin si përforcim strategjik.
Tottenham nuk qëndron pas, me “Spurs” që gjithashtu janë të interesuar për lojtarin, duke e parë si investim afatgjatë dhe profil që i përshtatet filozofisë së tyre.
Garnacho ka treguar potencial të lartë dhe vazhdon të jetë një nga talentet më premtues në Angli, por konkurrenca e ashpër për një vend titullari te “Djajtë e Kuq” ka ndikuar në vendimin e tij për të shqyrtuar alternativa.
Manchester United synon të përfitojë rreth 50 milionë euro nga shitja e tij, një shumë që do të përdorej për të rindërtuar skuadrën gjatë këtij afati kalimtar veror. /Telegrafi/
