Saga më e përfolur e kësaj vere në tregun e transferimeve është ajo e Alexander Isak dhe Liverpoolit. Sulmuesi kryesor i Newcastle është një objektiv i madh për The Reds, ndërsa edhe vetë suedezi ka shprehur publikisht dëshirën për t’u transferuar në “Anfield”.
Megjithatë, pengesa kryesore mbetet klubi i tij aktual, Newcastle United.
Liverpooli bëri një ofertë fillestare prej rreth 130 milionë eurosh, e cila u refuzua nga Newcastle. Isak ka bërë të qartë se dëshiron largimin, por skuadra e Eddie Howe nuk ka arritur ende të gjejë një zëvendësues të përshtatshëm dhe për këtë arsye po bën gjithçka për ta mbajtur.
Situata është ndërlikuar nga fakti se lojtari nuk është i lumtur, gjë të cilën e ka theksuar edhe vetë trajneri Howe.
“Ai është lojtari ynë, nën kontratë. Dua skuadrën më të fortë të mundshme, por dua edhe lojtarë që duan të luajnë për këtë klub. Do të shohim çfarë ndodh”, u shpreh Howe.
Për të zgjidhur çështjen, Newcastle po përgatit një kontratë të re për Isakun, me rritje të ndjeshme page dhe përfshirjen e një klauzole lirimi në rast shitjeje. Ky mund të jetë “asi” i fundit i drejtuesve për ta bindur sulmuesin të qëndrojë.
Nëse as ky opsion nuk funksionon, klubi synon ta shesë për çmimin më të lartë të mundshëm. Në këtë drejtim, Liverpooli pritet të rikthehet me një ofertë të re dhe më të lartë.
Për momentin, gjithçka mbetet e hapur, ndërsa kjo pritet të jetë saga më e ndjekur e afatit kalimtar të verës 2025. /Telegrafi/
