Ish-mesfushori i Manchester United, Scott McTominay, raportohet se ka telefonuar Rasmus Hojlund gjatë fundjavës për ta bindur sulmuesin danez të transferohet te Napoli.
Hojlund, i cili iu bashkua United në vitin 2023, ka pasur një periudhë zhgënjyese në Old Trafford dhe mund të largohet para mbylljes së merkatos.
22-vjeçari nuk është përfshirë në listën e ndeshjes për dy javët e para të Premier League këtë sezon, ndërsa ardhjet e Benjamin Sesko, Matheus Cunha dhe Bryan Mbeumo e kanë shtyrë më poshtë në hierarkinë e sulmit.
Në total, Hojlund ka shënuar 26 gola në 95 paraqitje për “Djajtë e Kuq”. Ai është përfolur edhe për një kalim te Milani, por sipas “Corriere dello Sport”, Napoli shihet si destinacion më i mundshëm.
Kampionët italianë janë të hapur për një marrëveshje huazimi prej 5 milionë eurosh, me detyrim blerjeje që do të arrinte në 40 milionë euro shtesë.
McTominay, që sezonin e kaluar iu bashkua Napolit dhe ndihmoi skuadrën të fitonte titullin e Serie A me 12 gola në 34 paraqitje, ka luajtur 34 ndeshje së bashku me Hojlundin te United. Madje, ai i dha një asist sulmuesit për një gol kundër Copenhagenit në Ligën e Kampionëve në vitin 2023.
Napoli e sheh Hojlundin si zëvendësues të mundshëm të Romelu Lukakut, i cili është jashtë fushave për shkak të një dëmtimi. Megjithatë, një pengesë mund të mbeten pagat, pasi danezi kërkon rreth 6.5 milionë euro në vit. /Telegrafi/
