Kosova do të luajë sot (e premte) në udhëtim ndaj Zvicrës në kuadër të ndeshjes së parë kualifikuese për Kupën e Botës 2026, në kuadër të Grupit B.
‘Dardanët’ kanë udhëtuar drejt Bazelit me disa mungesa të theksuara siç janë ato të Edon Zhegrovës dhe Milot Rashicës, por plot besim për një rezultat pozitiv.
Përballja e Kosovës me ‘Helvetikët’ do të jetë e katërta mes këtyre dy kombëtareve.
Të gjitha statistikat dëshmojnë se Kosova ka qenë gjithmonë një “arrë e fortë” për Zvicrën pasi këta të fundit nuk kanë regjistruar asnjë fitore deri më tani ndaj ‘Dardanëve’.
Tri ndeshjet e zhvilluara deri më tani kanë përfunduar që të gjitha me rezultat të barabartë.
Për herë të parë këto dy kombëtare u takuan në një ndeshje miqësore të zhvilluar në Cyrih më 29 mars të vitit 2022, ndeshje që përfundoi baras me rezultat 1-1.
Dy takimet e radhës mes Zvicrës dhe Kosovës u zhvilluan në kuadër të kualifikimeve për “Euro 2024”.
Ndeshja e parë e zhvilluar në ‘Fadil Vokrri’ më 9 shtator kishte përfunduar me rezultat të barabartë 2-2, me Vedat Muriqin që shënonte të dy golat.
Në ndërkohë ajo e kthimit e zhvilluar pikërisht në stadiumin ku do të luhet ndeshja e sotme, kishte përfunduar po ashtu baras me rezultat 1-1, ku golin e vetëm për Kosovën e kishte realizuar Muhamet Hyseni./Telegrafi/
