Kombëtarja e Kosovës ka pësuar humbje të thellë me rezultat 4-0 në udhëtim ndaj Zvicrës, në kuadër të ndeshjes së parë kualifikuese për Kupën e Botës 2026.
Zviceranët e nisën më mirë ndeshjen duke dominuar si në aspektin e posedimit të topit ashtu edhe në atë të krijimit të rasteve.
‘Helvetikët’ epërsinë e morën në minutën e 22-të me anë të Manuel Akanjit i cili me kokë realizoi për rezultatin 1-0.
Vendasit ia dolën të dyfishojnë epërsinë vetëm tre minuta më vonë, këtë herë me anë të Breel Embolos (25’) që shënoi për 2-0 pas asistimit të Dan Ndoye.
Mbrojtja e Kosovës ra sërish në minutën e 39-të kur edhe Silvan Widmer realizoi për ta çuar rezultatin në 3-0.
Se Kosova pati një paraqitje të turpshme në pjesën e parë u konfirmua në sekondat e fundit të saj kur Breel Embolo realizoi golin e tij të dytë personal dhe të katërtin për Zvicrën (4-0).
Duke marrë parasysh avantazhin e madh të krijuar në pjesën e parë, Zvicra nuk tregoi shumë interesim për lojë në pjesën e dytë.
‘Dardanët’ në anën tjetër pavarësisht disa zëvendësimeve të bëra, nuk arritën që të ndryshojnë diçka, duke bërë që rezultati të mbetet po ai i pjesës së parë.
Kosova tani do të synojë ta lë pas krahëve këtë humbje të hidhur dhe vetëm tri ditë më vonë (8 shtator) e pret një tjetër duel i vështirë në ‘Fadil Vokrri’, ku do të jenë nikoqir të Suedisë./Telegrafi/
