Një nga yjet e CSKA-së dhe titullar i pazëvendësueshëm, mbrojtësi i Kosovës, Lumbardh Dellova, ka refuzuar të stërvitet me ekipin, duke kërkuar largimin nga klubi, pasi tashmë ka disa oferta dhe do të transferohet me shumë gjasë në Arabinë Saufite.
Lajmi është konfirmuar nga agjenti i tij, Rrezart Kashtanjeva, i cili deklaroi se klienti nuk ka ndërmend të rikthehet te “të kuqtë”.
Sipas tij, aktualisht janë duke u zhvilluar negociata me tre klube të ndryshme dhe deri në përfundimin e tyre, Dellova nuk do të paraqitet në ndeshje për CSKA-në.
Bisedimet me klubin bullgar po fokusohen në klauzolën e lirimit, e cila llogaritet rreth 900 mijë euro, me një klub elitar saudit që është gati ta paguajë.
Kandidati më serioz për shërbimet e mbrojtësit është skuadra saudite Al Najma, e gatshme të paguajë shumën e kërkuar dhe t’i ofrojë lojtarit një pagë prej 70 deri 80 mijë euro në muaj.
Dellova ka qenë titullar në katër ndeshjet e para të kampionatit të ri, duke mos humbur asnjë minutë. Që nga ardhja e tij sezonin e kaluar, ai u bë një nga pikat më të forta të skuadrës, duke regjistruar 31 paraqitje në kampionat dhe pesë të tjera në Kupën e Bullgarisë. /Telegrafi/
