Mikel Arteta ka sjellë gjashtë fytyra të reja te Arsenali gjatë verës, por raportohet se trajneri ‘Topçinjve’ dëshiron edhe dy përforcime të tjera para mbylljes së afatit kalimtar.
Pas tre sezoneve radhazi duke përfunduar në vendin e tretë, Arsenal kanë shpenzuar rreth 200 milionë euro për transferime për sezonin 2025/2026.
Skuadra nga veriu i Londrës është forcuar në disa pozicione, duke blerë sulmuesin Viktor Gyokeres për 55 milionë euro, si dhe duke sjellë Noni Madueke, Martin Zubimendi, Cristhian Mosquera, Christian Norgaard dhe Kepa Arrizabalaga.
Të gjashtë përforcimet e reja ishin pjesë e humbjes 3-2 në miqësoren ndaj Villarrealit të mërkurën në mbrëmje, ku Arsenal humbën edhe në penallti.
Por duket se ‘Topçinjtë’ nuk e kanë përmbyllur ende afatin kalimtar të verës.
Sipas një raporti të ri nga The Times, që analizon situatën e çdo klubi në Ligën Premier, Arteta ende dëshiron një sulmues të krahut të majtë dhe një mesfushor kreativ.
Raportohet se Arsenal planifikon të kontaktojë Crystal Palace për Eberechi Eze, i cili ka pasur një klauzolë lirimi prej 68 milionë eurosh që ka skaduar javën e kaluar, dy javë para nisjes së sezonit të ri të Ligës Premier.
Arsenal shpreson të marrë mesfushorin anglez për një shumë më të ulët dhe beson se ka shanse të mira për këtë në fund të afatit kalimtar, pasi Eze ka edhe dy vite kontratë në ‘Selhurst Park’.
Gjithashtu, ata po monitorojnë situatën e yllit të Real Madrid, Rodrygo Goes, duke pritur të shohin nëse braziliani do të jetë i disponueshëm për huazim.
Liverpool raportohet gjithashtu se po ndjek situatën e Rodrygo, ndërsa Fabrizio Romano njofton se Paris Saint-Germain mund të bëjë një përpjekje të re për të, në varësi të asaj që do të ndodhë me Bradley Barcola./Telegrafi/
