Alireza Faghani, një gjyqtar me origjinë nga Irani dhe shtetësi australiane, është emëruar për të gjykuar finalen e Kupës së Botës për Klube mes Paris Saint-Germain dhe Chelseat, që do të zhvillohet në stadiumin MetLife në New York.
Ky emërim ka ngjallur reagime dhe diskutime, jo vetëm për rëndësinë sportive të ndeshjes, por edhe për sfondin diplomatik që e shoqëron.
Për shkak të tensioneve mes Iranit dhe Izraelit si dhe kufizimeve aktuale të SHBA-së për shtetasit iranianë, prania e Faghanit në këtë takim konsiderohet befasuese.
Ai do të jetë i vetmi shtetas me origjinë iraniane që do të gjendet në fushë gjatë finales.
Faghani ka përvojë të gjatë në ndeshje me presion të lartë. Një nga momentet më të komentuara ishte gjykimi i tij në sfidën mes Argjentinës dhe Francës në Kupën e Botës 2018, ku ai akordoi një penallti për ndërhyrjen e Marcos Rojos ndaj Kylian Mbappe – një vendim që vazhdon të përmendet edhe sot, sidomos duke pasur parasysh se PSG është sërish në fushë në këtë finale.
FIFA e ka mbrojtur vendimin, duke theksuar kualifikimet e Faghanit: ai ka gjykuar në Lojërat Olimpike, Kupat e Botës, Kupën e Azisë dhe finalen e Lojërave Olimpike midis Brazilit dhe Gjermanisë në Rio 2016.
Kryetari i Komitetit të Gjyqtarëve në FIFA, Pierluigi Collina, u shpreh: “Ne i zgjedhim gjyqtarët bazuar në performancë, jo në pasaporta”.
Megjithatë, origjina dhe shtetësia e Faghanit mbeten pjesë e diskutimeve publike, veçanërisht në një ngjarje kaq të profilit të lartë, ku futbolli dhe diplomacia shpesh ndërlidhen. /Telegrafi/
