Real Madridi mund të përfitojë 30 milionë euro këtë verë nga një lojtar që nuk ka luajtur kurrë për klubin në një ndeshje zyrtare.
“Los Blancos” kanë qenë aktivë në afatin kalimtar këtë sezon, duke transferuar emra si Trent Alexander-Arnold nga Liverpool dhe Dean Huijsen nga Bournemouth. Po ashtu, i janë bashkuar klubit edhe Franco Mastantuono, si dhe ish-mbrojtësi i majtë i Manchester United, Alvaro Carreras.
Në total, Real Madrid ka shpenzuar mbi 150 milionë euro, por mund të rikuperojë 30 milionë euro nëse një transferim i përfolur realizohet.
Sipas gazetës spanjolle Marca, Atletico Madrid po kërkon të përforcojë sulmin dhe Diego Simeone ka vënë në shënjestër anësorin e Real Sociedadit, Takefusa Kubo, i cili më parë ka qenë pjesë e Real Madridit.
Kubo, që u rrit në akademinë e Barcelonës dhe u quajt dikur "Messi japonez", iu bashkua Real Madridit në vitin 2019 për 6.5 milionë euro, por nuk luajti kurrë një ndeshje zyrtare për ekipin e parë.
Gjatë kohës së tij te Real Madrid, ai u huazua në katër klube të ndryshme: Mallorca, Villarreal, Getafe, dhe përsëri Mallorca.
Pas këtyre eksperiencave, ai u transferua përfundimisht te Real Sociedad në vitin 2022, ku ka shkëlqyer me 23 gola në 137 ndeshje në të gjitha garat.
Në kontratën e tij ekziston një klauzolë lirimi prej 60 milionë eurosh, dhe Real Madrid mban 50 për qind të të drejtave ekonomike të lojtarit.
Kjo do të thotë se nëse Atletico paguan klauzolën, Real Madrid do të përfitojë automatikisht 30 milionë euro, një fitim i pastër për një lojtar që asnjëherë nuk mbajti fanellën madrilene në fushë./Telegrafi/
