Saga e transferimit të Alexander Isak, sulmuesit të Newcastle United, drejt Liverpoolit ka marrë një kthesë të re në prag të sezonit të ri të Ligës Premier.
Gjatë gjithë verës, Isak ka qenë i lidhur vazhdimisht me një kalim në “Anfield”. Megjithatë, në fillim të këtij muaji, Liverpoolit iu refuzua një ofertë prej 130 milionë euro, shumë kjo nën kërkesën e Newcastle prej 177 milionë euro. “Magpies” kanë mbetur të vendosur të mos e shesin yllin e tyre.
Sulmuesi suedez humbi turneun parasezonal të Newcastle dhe u stërvit individualisht te ish-klubi i tij, Real Sociedad. Trajneri Eddie Howe deklaroi pas rikthimit të tij se “nuk mund ta përfshijë” Isakun në planet aktuale të skuadrës.
Sipas Craig Hope të Daily Mail, lojtari ka nisur një “grevë” për të detyruar transferimin te Liverpooli dhe nuk do të jetë pjesë e ndeshjes hapëse të Newcastle në Ligën Premier, këtë të shtunë kundër Aston Villas.
Pavarësisht situatës, opsioni i preferuar i klubit mbetet rinovimi i kontratës së Isakut. Megjithatë, Newcastle nuk e përjashton mundësinë që pas 1 shtatorit, nëse ai nuk shitet, të përpiqet ta integrojë sërish në skuadër. Kontrata e 25-vjeçarit skadon në verën e vitit 2028 dhe nuk përmban klauzolë lirimi, gjë që i jep klubit kontroll të plotë mbi të ardhmen e tij.
Këtë javë, Newcastle publikoi listën e numrave zyrtarë të skuadrës, me Isakun që ruan numrin 14 – të njëjtin që mbante idhulli i tij, Thierry Henry, gjatë kohës te Arsenali.
Në mungesë të tij, “Magpies” kanë vetëm një sulmues natyral në dispozicion – William Osula. Megjithatë, pritet që në sfidën kundër Villas rolin e qendërsulmuesit ta marrë Anthony Gordon ose afrimi i ri, Anthony Elanga, i cili zakonisht luan si sulmues anësor ose mesfushor ofensiv, por ka përvojë edhe si qendërsulmues te Manchester United. /Telegrafi/
