Në Alaska u zhvillua një takim i jashtëzakonshëm mes presidentit amerikan, Donald Trump dhe homologut rus, Vladimir Putin, me qëllimin kryesor për të diskutuar rrugët drejt përfundimit të luftës në Ukrainë.

Ky takim, i mbajtur në një territor simbolik dhe neutral si Alaska, priste të sillte zhvillime të rëndësishme në përpjekjet për arritjen e një marrëveshjeje paqeje dhe uljen e tensioneve ndërkombëtare.

Telegrafi do t'iu mbajë të informuar minutë pas minute

16/08/2025 23:42-Aeroplanët luftarakë amerikanë shoqërojnë aeroplanin e Putinit jashtë Alaskës, publikohen pamjet

Më 15 gusht 2025, presidenti i SHBA-së Donald Trump dhe presidenti rus Vladimir Putin u takuan në Bazën e Përbashkët Elmendorf-Richardson në Anchorage, Alaska, për bisedime me rëndësi të lartë të përqendruara në luftën në Ukrainë. Ndërsa Trump fluturoi për në JBER në bordin e Air Force One, Putin mbërriti në Alaska në bordin e një Il-96-300PU, i cili është aeroplani kryesor presidencial rus për udhëtime në distanca të gjata, i paraprirë nga aeroplanë të tjerë mbështetës, përfshirë një Tu-214PU që mbante anëtarë të delegacionit të tij...më shumë.

16/08/2025 20:39-Putin jep komentet e para mbi takimin me Trumpin në Alaskë

Vladimir Putin tha se vizita e tij në Alaskë ishte “e dobishme dhe në kohën e duhur”. Udhëheqësi rus tha gjithashtu se biseda që pati me Donald Trumpin ishte “e sinqertë dhe thelbësore”...më shumë.

16/08/2025 18:53-Çfarë thanë udhëheqësit evropianë pas takimit të Trumpit dhe Putinit?

Disa udhëheqës evropianë kanë bërë deklaratat e tyre në lidhje me takimin e Trumpit dhe Putinit.

U.S. President Donald Trump and Russian President Vladimir Putin look at each other during a press conference following their meeting to negotiate an end to the war in Ukraine, at Joint Base Elmendorf-Richardson, in Anchorage, Alaska, U.S., August 15, 2025. REUTERS/Kevin Lamarque TPX IMAGES OF THE DAY

Dhe vijnë pasi tetë udhëheqës – përfshirë Keir Starmer – bënë një deklaratë të përbashkët pasi folën me Trumpin dhe Zelenskyn.
Ja çfarë kanë thënë disa nga udhëheqësit e tjerë...më shumë.

16/08/2025 17:08-Putin i propozon Trumpit shkëmbim territorial në Ukrainë për të ngrirë vijën e frontit?

Vladimir Putin i tha Donald Trumpit se mund të zbutë disa përfitime territoriale në Ukrainë në këmbim të rajonit lindor të Donetskut. Udhëheqësi rus i tha Trumpit se mund të ngrijë pjesën tjetër të vijës së frontit nëse plotësohen kërkesat e tij kryesore....më shumë.

16/08/2025 15:56-Ben Wallace “i shqetësuar” se Trump mund ta paraqesë Zelenskyn si nxitës lufte

Ish-ministri britanik i Mbrojtjes, Ben Wallace ndihet “i shqetësuar” sepse presidenti amerikan, Donald Trump mund të sulmojë sërish presidentin ukrainas, Volodymyr Zelensky, i cili do ta vizitojë të hënën Uashingtonin. Ai deklaroi se Trump “nuk ka arritur të realizojë një marrëveshje” dhe në këso rastesh, lideri amerikan gjen fajtorin diku tjetër. “Jam i shqetësuar se javën e ardhshme mund të jetë presidenti Zelensky, ai që do të fajësohet”, tha deputeti britanik.

16/08/2025 15:30-Ministri i Jashtëm çek për takimin Trump-Putin: Dëgjuam përsëri budallallëqe propagandistike të Rusisë

Jan Lipavsky, ministër i Jashtëm i Republikës Çeke, ishte evropiani i parë që reagoi ndaj takimit të presidentit amerikan, Donald Trump me presidentin rus, Vladimir Putin, i zhvilluar të mërkurën në Alaskë. Në fillim të deklaratës së tij, shefi i diplomacisë çeke i dërgoi një mesazh Trumpit, duke e falënderuar për “përpjekjen që ta ndalë luftën”...më shumë.

16/08/2025 15:00-Mediumi amerikan zbuloi detaje nga telefonata mes Trumpit, Zelenskyt dhe liderëve evropianë

Presidenti amerikan, Donald Trump, pas përfundimit të takimit me homologun rus, Vladimir Putin, zhvilloi një bisedë telefonike me liderin e Ukrainës, Volodymyr Zelensky, në të cilën morën pjesë edhe një numër i madh liderësh evropianë. Përveç dy presidentëve, në bisedë morën pjesë sekretari i përgjithshëm i NATO-s, Mark Rutte, presidentja e Komisionit Evropian, Ursula von der Leyen, kryeministri i Britanisë së Madhe, Keir Starmer, kancelari i Gjermanisë, Friedrich Merz, kryeministrja e Italisë, Giorgia Meloni, presidenti i Finlandës, Alexander Stubb dhe presidenti i Polonisë, Karol Nawrocki...më shumë.

16/08/2025 14:30-Von der Leyen: Garancitë e sigurisë për Ukrainën dhe Evropën janë çelësi i paqes

Presidentja e Komisionit Evropian, Ursula von der Leyen, tha se garancitë e forta të sigurisë për Ukrainën dhe Evropën janë "çelësi" për çdo marrëveshje paqeje që do të ndalonte luftën. "Bashkimi Evropian po punon ngushtë me presidentin Zelensky dhe Shtetet e Bashkuara për të arritur një paqe të drejtë dhe të qëndrueshme. Garancitë e forta të sigurisë që mbrojnë interesat jetësore të Ukrainës dhe Evropës janë absolutisht të nevojshme", shkroi Von der Leyen në platformën X.

16/08/2025 14:03-Zyrtari ukrainas: Trump foli si Putini, kjo është e rrezikshme

Zyrtari i lartë ukrainas, Oleksandr Merezhko, ka deklaruar se presidenti amerikan, Donald Trump, duke propozuar që armëpushimi të zëvendësohet me një marrëveshje paqeje, në fakt ka marrë anën e presidentit rus, Vladimir Putin. “Fatkeqësisht, Trump ka marrë qëndrim si Putini, dhe kjo ishte kërkesa e tij”, tha Merezhko, kryetar i Komitetit për Çështjet e Jashtme në parlamentin ukrainas...më shumë.

16/08/2025 13:30-Zelensky: Duhet paqe e vërtetë, jo vetëm një tjetër pauzë mes pushtimeve ruse

Volodymyr Zelenskyy

Presidenti ukrainas, Volodymyr Zelensky ka lëshuar një deklaratë tjetër pas takimit të presidentit amerikan, Donald Trump me homologun rus, Vladimir Putin, duke këmbëngulur se “duhet arritur paqe e vërtetë” dhe jo “vetëm një tjetër pauzë mes pushtimeve ruse”. Komentet e tij vijnë pasi nga bisedimet në Alaska nuk doli ndonjë marrëveshje armëpushimi, ku presidenti ukrainas nuk ishte i ftuar...më shumë

16/08/2025 13:00-Shtëpia e Bardhë fshin pamjet

Shtëpia e Bardhë ka fshirë pamjet të momentit kur presidenti amerikan, Donald Trump pret me duartrokitje homologun rus, Vladimit Putin - por të gjithë i panë. The Guardian vuri re se në videon e paraqitur nga administrata e Trump, diçka mungonte tashmë - momenti i duartrokitjes dhe gëzimi i Trumpit.

16/08/2025 12:30-Me kënd foli Trump pas takimit me Putinin

Është bërë e ditur se me kënd ka folur presidenti amerikan, Donald Trump pas takimit me homologun rus, Vladimir Putin. Së pari, Trump foli me presidentin ukrainas, Volodymyr Zelensky, dhe më pas në bisedë u bashkuan edhe udhëheqësit evropianë.

16/08/2025 12:04-Liderët evropianë kërkojnë një takim Trump, Zelensky dhe Putin

Liderët evropianë kanë lëshuar një deklaratë të përbashkët rreth takimit të mbrëmshëm midis presidentit amerikan, Donald Trump dhe homologut rus, Vladimir Putin. Ata thanë se “mirëpritën përpjekjet e presidentit Trump për të ndaluar vrasjet në Ukrainë, për të përfunduar luftën e agresionit të Rusisë dhe për të arritur një paqe të drejtë dhe të qëndrueshme”...më shumë.

16/08/2025 11:46-Ish-këshilltari i Trumpit: Putin mori gjithçka, Trump asgjë

Këshilltari i mëparshëm i presidentit amerikan, Donald Trump, John Bolton deklaroi se “Putin mori pothuajse gjithçka që dëshironte — Trump nuk mori asgjë përveç premtimeve për takime".

16/08/2025 11:27-Trump: Marrëveshja e paqes mund t’i japë fund luftës pa një armëpushim paraprak

Donald Trump thotë se “të gjithë” besojnë se marrëveshja e paqes mund t’i japë fund luftës pa një armëpushim paraprak. Presidenti amerikan sapo ka shkruar në Truth Social pas asaj që e quajti një “ditë të shkëlqyer dhe shumë të suksesshme në Alaska”...më shumë.

16/08/2025 10:46-Zelensky flet pas takimit Trump-Putin

Presidenti ukrainas, Volodymyr Zelensky tha se do të takohet me presidentin amerikan, Donald Trump në Uashington të hënën. Ai tha se lideri amerikan foli me të në telefon për më shumë se një orë e gjysmë pasi ishte takuar mbrëmë me presidentin rus Putin në Alaskë. Lideri ukrainas tha se takimi të hënën do të jetë “për të diskutuar të gjitha detajet lidhur me përfundimin e vrasjeve dhe luftës” dhe shtoi se ishte “mirënjohës për ftesën”.

16/08/2025 09:30-Donald Trump i dorëzoi Putinit një letër nga Melania për fëmijët e rrëmbyer

Donald Trump i ka dorëzuar personalisht një letër presidentit rus Vladimir Putin nga bashkëshortja e tij, Melania Trump, gjatë një samiti – raporton agjencia Reuters. Sipas dy zyrtarëve të Shtëpisë së Bardhë, letra kishte një karakter personal dhe lidhej me gjendjen e fëmijëve në Ukrainë dhe Rusi, veçanërisht atyre që janë rrëmbyer. Megjithatë, përmbajtja e saktë e letrës nuk është bërë publike...më shumë.

16/08/2025 09:00-Trump pati një bisedë të gjatë me Zelenskyn gjatë fluturimit nga Alaska

Presidenti i SHBA-së, Donald Trump, pati një bisedë të gjatë me homologun ukrainas, Volodymyr Zelensky, gjatë fluturimit me aeroplan gjersa po kthehej nga Alaska në Uashington.

Trump zbriti në bazën ushtarake Joint Base Andrews në Maryland pak pas orës 2:00, sipas orës lokale amerikane (08:00 në Kosovë), pas përfundimit të samitit me presidentin rus, Vladimir Putin.

Sipas sekretares për shtyp të Shtëpisë së Bardhë, Karoline Leavitt, presidenti kaloi pjesën më të madhe të fluturimit gjashtë-orësh në telefon. Pas telefonatës me Zelenskyn, Trump foli edhe me zyrtarët e NATO-s, tha ajo.

16/08/2025 08:44-Reuters kujton fotot e Putinit me presidentë të tjerë të SHBA-së

"Bush ndjeu se kishte një marrëdhënie të veçantë me Putinin dhe se mund të shikonte në shpirtin e tij." "Mendoj se tensioni në marrëdhëniet midis Obamës dhe Putinit ishte veçanërisht i lartë, dhe fotografia e tyre e ulur në karrige ishte ndoshta më mbresëlënëse"

16/08/2025 08:20-Pikat kryesore nga takimi midis Trumpit dhe Putinit në Alaska

Me aeroplanë luftarakë, tapet të kuq dhe slogani shpresëdhënës “Në ndjekje të paqes”, presidenti amerikan, Donald Trump priti homologun rus, Vladimir Putin në një samit në Alaska, i cili përfundoi papritur dhe pa rezultate të qarta. Pas gati tre orësh takim, të dy liderët deklaruan “përparim”, por lanë konferencën për shtyp pa sqaruar çfarë kishin arritur konkretisht...më shumë.

16/08/2025 07:50-Pse nuk iu përgjigjën pyetjeve të gazetarëve Trump dhe Putin?

Në Alaskë, mbrëmë u mbajt një takim mes presidentit të SHBA-së, Donald Trump dhe homologut të Rusisë, Vladimir Putin. Në një deklaratë të shkurtër të zëdhënësit të Kremlinit, Dmitry Peskov nuk e komentoi gjerësisht samitin, por shpjegoi pse të dy liderët nuk iu përgjigjën pyetjeve të mediave...më shumë.

16/08/2025 04:00-Pas Putinit, Trump largohet nga Alaska

Presidenti amerikan, Donald Trump është larguar nga samiti me presidentin rus, Vladimir Putin.

16/08/2025 03:37-Putin largohet nga Alaska

Presidenti rus, Vladimir Putin është larguar nga samiti me presidentin amerikan, Donald Trump.

16/08/2025 01:38-“Herën tjetër në Moskë” – konferenca e Trumpit dhe Putinit mbyllet me një ftesë ‘surprizë’

Konferenca e shkurtër për shtyp e Trumpit dhe Putinit përfundoi pa u përballur me pyetjet e gazetarëve nga udhëheqësit.

Në vend të kësaj, Trump i drejtohet Putinit dhe e falënderon përsëri, shkruan skynews. “Do të flasim me ju shumë shpejt dhe ndoshta do të shihemi përsëri shumë shpejt”, i thotë ai presidentit rus. “Herën tjetër në Moskë”, i përgjigjet Putin. Për më shumë, klikoni KËTU.

16/08/2025 01:30-Trump: Takimi me Putinin ishte produktiv, por nuk arritëm marrëveshje

Presidenti i Shteteve të Bashkuara, Donald Trump, tha se takimi me udhëheqësin rus, Vladimir Putin, ishte “shumë produktiv”, por ata nuk arritën një marrëveshje lidhur me përfundimin e luftës mes Rusisë dhe Ukrainës.

Gjatë konferencës së përbashkët për media pas takimit në Alaskë, që zgjati gati 3 orë, Trump tha se me Putinin janë pajtuar për shumë pika, por jo edhe për më të rëndësishmen – duke mos specifikuar nëse bëhet fjalë për një armëpushim në luftën në Ukrainë që nisi më 2022. Sipas presidentit amerikan, ka gjasa të mira që palët të arrijnë në të ardhmen një marrëveshje. Për më shumë, klikoni KËTU.

16/08/2025 01:20-“Ramë dakord për shumë pika”, Trump deklarohet pas takimit me Putinin

Donald Trump foli pasi Vladimir Putin hapi konferencën për shtyp.

Ai falënderoi presidentin rus për deklaratën e tij “të thellë” dhe e përshkruan takimin si “shumë produktiv”. “Kishte shumë, shumë pika për të cilat ramë dakord”, tha ai. Për më shumë, klikoni KËTU.

16/08/2025 01:14-Putin hap konferencën për shtyp: Ne jemi të përgatitur të punojmë për sigurinë e Ukrainës

Vladimir Putin hapi konferencën për shtyp dhe tha se negociatat u “zhvilluan në një atmosferë konstruktive respekti të ndërsjellë”.

“Kishim negociata shumë të hollësishme që ishin mjaft të dobishme”, tha ai dhe falënderoi Donald Trump për propozimin e takimit të Alaskës. Për më shumë, klikoni KËTU.

16/08/2025 01:00-Shtëpia e Bardhë fshin pamjet e momentit kur Trump e pret me duartrokitje Putinin

Shtëpia e Bardhë fshin pamjet kur presidenti amerikan, Donald Trump e pret me duartrokitje homologun rus, Vladimir Putin - por të gjithë i panë. The Guardian vuri re se në videon e paraqitur nga administrata e Trump, diçka mungonte tashmë - duartrokitja.

16/08/2025 00:44-"Gjithçka është e mrekullueshme", i dërguari i Putinit jep reagimin e parë për takimin

I dërguari i Putinit jep reagimin e parë për samitin. Kirill Dmitriev ka thënë se takimi shkoi jashtëzakonisht mirë dhe dha një vlerësim pozitiv për progresin e negociatave ruso-amerikane "E mrekullueshme, gjithçka është e mrekullueshme", u tha ai gazetarëve.

16/08/2025 00:32-Përfundon takimi Trump-Putin pas pothuajse tre orë

Takimi me dyer të mbyllura i Donald Trump me Vladimir Putin ka përfunduar pasi zgjati pothuajse tre orë.

Sekretari i shtetit i SHBA-së, Marco Rubio, dhe i dërguari Steve Witkoff u ulën pranë Trumpit, ndërsa ministri i jashtëm rus, Sergei Lavrov, dhe ndihmësi Yuri Ushakov ishin pranë Putinit. Tani pritet një konferencë për shtyp së shpejti.

16/08/2025 00:31-Nga Alaska, Trump nis fushatën për mbledhje fondesh: Ky takim është me rrezik të lartë

Ekipi i Donald Trump u ka dërguar një email mbështetësve të tij duke kërkuar donacione ndërsa ai zhvillon bisedime me Putinin.

Emaili titullohet: “TRUMP NË ALASKA! ME PUTININ!” Për më shumë, klikoni KËTU.

15/08/2025 23:07-Simbol i forcës: Aeroplani bombardues amerikan B2 fluturon mbi kokat e Trumpit dhe Putinit

Dy bombardues B-2 u dërguan me aeroplan në Bazën e Përbashkët Elmendorf-Richardson të Alaskës përpara takimit midis presidentit amerikan Donald Trump dhe atij rus Vladimir Putin.

Bombarduesit e fshehtë janë të të njëjtit lloj që u përdorën nga SHBA për të goditur vendet bërthamore të Iranit në operacionin e qershorit. Për më shumë, klikoni KËTU.

15/08/2025 22:51-Reagimi i çuditshëm i Putinit gjatë takimit me Trumpin ndaj gazetarëve

Ky është momenti kur presidenti rus Vladimir Putin çuditet me gazetarët që ndodhen të pranishëm në takimin e tij me presidentin amerikan Donald Trump në Alaska. Putin shihet duke shtrembëruar fytyrën kur stafi i presidentit amerikan nis të thërrasë “Thank you Press” (Faleminderit medias) dhe duke u kërkuar atyre të largohen.

15/08/2025 22:04-Pamje nga brenda takimit Trump-Putin

Donald Trump dhe Vladimir Putin kanë filluar takimin e tyre në Alaska. Sekretari i shtetit i SHBA-së, Marco Rubio, dhe i dërguari Steve Witkoff janë ulur pranë Trumpit, ndërsa ministri i jashtëm rus, Sergei Lavrov, dhe ndihmësi Yuri Ushakov janë pranë Putinit.

15/08/2025 21:39-“A do ta ndalni vrasjen e civilëve?”, Putini bëhet kinse nuk e dëgjoi pyetjen e gazetares

Presidenti amerikan Donald Trump dhe ai rus Vladimir Putin janë takuar në Alaskë. Të dy presidentët gjatë ecjes në tepihun e kuq u panë të buzëqeshur, teksa u ngjitën për në skenë për fotografinë e përbashkët.

Gjatë ecjes nëpër tepihun e kuq, ishin aeroplanët luftarakë të Shteteve të Bashkuara të Amerikës ata që fluturuan në qiell, e të cilët ia morën vëmendjen presidentit rus, Putin. Më pas, një nga gazetaret e pranishme në këtë ngjarje historike e pyeti Putinin se “a jeni gati për armëpushim” dhe se “a jeni gati ta ndalni vrasjen e civilëve”. Për më shumë, klikoni KËTU.

15/08/2025 21:20-Nis takimi historik, Trump e pret Putinin me duartrokitje dhe shtrëngim duarsh

Më shumë se gjashtë vjet pas takimit të tyre të fundit, Donald Trump dhe Vladimir Putin janë përsëri ballë për ballë. Të dy udhëheqësit përshëndetën njëri-tjetrin me një shtrëngim duarsh pasi zbresin nga aeroplanët e tyre në bazën ushtarake Elmendorf-Richardson në Anchorage, Alaska. Trump i buzëqeshur madje duartrokiti presidentin rus ndërsa ai iu afrua në qilimin e kuq. Për më shumë, klikoni KËTU.

15/08/2025 20:55-Amerika shfaq fuqinë ushtarake në pritje të Putinit

Në minutat e fundit, Donald Trump zbarkoi në Anchorage në bordin e Air Force One. Zëvendësshefi i tij i stafit, Dan Scavino, ka postuar përditësime prapa skenave nga aeroplani.

15/08/2025 20:33-Trump zbarkon në Alaska, publikohen pamje nga vendi i takimit me Putinin

Donald Trump sapo ka zbarkuar në bazën ushtarake Elmendorf-Richardson në Alaska me Air Force One.

Presidenti amerikan ka mbërritur në bazën ushtarake para Vladimir Putinit. Siç raportohet, ai nuk ishte i qartë se çfarë do ta konsideronte sukses në takimin e tij me Putinin. Për më shumë, klikoni KËTU.

15/08/2025 20:11-"Skena është gati" - pamje nga vendi ku do të takohen Trump dhe Putin

Sapo janë publikuar pamje që tregojnë se ku do të takohen Donald Trump dhe Vladimir Putin sonte. Është shtruar një qilim i kuq, me aeroplanë luftarakë të pozicionuar në të dyja anët e një shenje "Alaska 2025".

Sipas faqes së internetit të ndjekjes Flightradar24, një aeroplan qeveritar rus sapo ka zbarkuar në Alaska. Nuk është e qartë nëse Putin është në bord. Aeroplani u nis nga qyteti Magadan në lindje të largët të Rusisë, ku Putin ishte më herët sot.

15/08/2025 20:02-Borë, akullnaja e kafshë të egra – ky është vendi ku Trump do ta presë Putinin për bisedime

Donald Trumpit do t’i duhen rreth shtatë orë për të arritur në Bazën e Përbashkët të largët Elmendorf-Richardson në Alaska – dhe Vladimir Putin përballet me një udhëtim po aq të gjatë.

Instalimi ushtarak amerikan në Anchorage kombinon bazën Elmendorf të Forcave Ajrore dhe Fort Richardson të Ushtrisë Amerikane. Për më shumë, klikoni KËTU.

15/08/2025 19:40-Trump deklarohet përpara takimit me Putinin: Dua armëpushim në Ukrainë

Donald Trump tha përpara takimit të tij me Vladimir Putinin në Alaska se dëshiron një armëpushim të menjëhershëm në Ukrainë.

Ai theksoi se qëllimi i tij kryesor është të ndalojë vrasjet dhe se nuk do të jetë i lumtur nëse kjo nuk ndodh menjëherë. Për më shumë, klikoni KËTU.

15/08/2025 18:15-Takimi fillon në ajër, Trump dhe Putin do të takohen në aeroplan

Presidenti i SHBA-së, Donald Trump, do të mirëpresë homologun e tij rus, Vladimir Putin, në aeroplanin e tij përpara se të nisen për në një bazë ushtarake në Alaska, ku do të fillojë pjesa zyrtare e takimit.

Takimi midis Putinit dhe Trumpit në Alaska do të jetë i pari i tyre në mandatin e dytë të Trumpit. Dyshja u takua për herë të fundit në vitin 2021. Për më shumë, klikoni KËTU.

15/08/2025 17:16-Kremlini: Takimi Trump-Putin mund të zgjasë deri në shtatë orë

Bisedimet midis Donald Trump dhe Vladimir Putin nuk do të jenë të shkurtra, pasi Kremlini tani thotë se ato mund të zgjasin të paktën gjashtë deri në shtatë orë, sipas mediave ruse. Agjencia shtetërore e lajmeve RIA raporton se takimi në Alaska do të zhvillohet edhe me pjesëmarrjen e ndihmësve dhe se Moska pret që ai të sjellë rezultate.

15/08/2025 17:00-Fluturimi i aeroplanit të Trumpit po ndiqet live nga mijëra njerëz, e gjithë bota e pret takimin e tij me Putinin

Aeroplani presidencial Boeing C-32A i Air Force One në fluturimin e tij për në Alaska po gjurmohet nga 12,300 persona në aplikacionin Flight Radar, gjë që konfirmon interesin global për rezultatin e takimit midis dy presidentëve.

Aeroplani i Trumpit u nis nga Baza Ajrore Andrews, SHBA, me një delegacion të udhëhequr nga Sekretari i Shtetit Marco Rubio.
Për më shumë, klikoni KËTU.

15/08/2025 16:18-Clinton: Do ta nominojë Trumpin për Çmimin Nobel për Paqen nëse e ndal luftën në Ukrainë

Presidenti amerikan Donald Trump mund të nominohet për Çmimin Nobel për Paqen nga një nga rivalet e tij më të betuara, Hillary Clinton.

Kundërshtarja demokrate e Trumpit tha se ajo do ta nominonte me dëshirë atë për çmimin e shquar nëse ai mund t’i jepte fund luftës në Ukrainë pa lejuar presidentin rus Vladimir Putin të merrte territor nga fqinji i saj. “Sinqerisht, nëse ai mund t’i jepte fund kësaj lufte të tmerrshme, nëse ai mund ta përfundonte atë pa e vendosur Ukrainën në një pozicion ku ajo duhej t’ia lëshonte territorin e saj agresorit, nëse ai mund t’i kundërvihej Putinit – diçka që nuk e kemi parë, por ndoshta kjo është mundësia – nëse presidenti Trump do të ishte arkitekti i kësaj, unë do ta nominoja atë për një Çmim Nobel për Paqen”, tha Clinton. Për më shumë, klikoni KËTU.

15/08/2025 16:13-Trump diskuton samitin e Alaskës me presidentin e Bjellorusisë

Donald Trump thotë se ka diskutuar samitin e Alaskës me presidentin bjellorus Aleksandr Lukashenko. Këtë e ka bërë të ditur përmes një postimi në Truth Social.

15/08/2025 15:55-Zelensky: Mbështetemi te Amerika

"Po mbështetemi te Amerika", tha presidenti ukrainas Volodymyr Zelensky. Ai ndau një deklaratë në rrjetet sociale pak pasi Donald Trump u nis drejt Alaskës. Në deklaratën e re, Zelenskyy thotë se Kievi po forcon vijën e frontit rreth qytetit me rëndësi strategjike, Pokrovsk...më shumë.

15/08/2025 15:20-Trump ka një mesazh për Putinin

Donald Trump ka folur për gazetarët në bordin e Air Force One. Putin beson se sulmet e vazhdueshme ndaj Ukrainës "i japin forcë", por Trump thotë se "unë mendoj se e dëmtojnë atë." "Mendoj se ata po përpiqen të negociojnë, në mendjen e [Putinit] kjo e ndihmon për të arritur një marrëveshje më të mirë. Por në fakt e dëmton... por do të flas me të për këtë më vonë", thotë 79-vjeçari. Trump vijon duke thënë se garancitë e sigurisë për Ukrainën, diçka që konsiderohet thelbësore në Kiev dhe Evropë, janë të mundshme "ndoshta, së bashku me Evropën dhe vende të tjera. Jo në formën e NATO-s"...më shumë.

15/08/2025 14:40-Pos Trumpit dhe Putinit - kush tjetër merr pjesë në bisedime?

Presidenti i SHBA-së, Donald Trump, dhe homologu rus, Vladimir Putin, do të fillojnë samitin me një bisedë ballë për ballë, me ndihmën e përkthyesve, para se të vazhdojnë diskutimet gjatë një drekë pune. Delegacion i madh amerikan: Shtëpia e Bardhë njoftoi se 16 zyrtarë do të udhëtojnë me presidentin amerikan, përfshirë Sekretarin e Shtetit Marco Rubio, Sekretarin e Thesarit Scott Bessent, Sekretarin e Tregtisë Howard Lutnick, Drejtorin e CIA-së John Ratcliffe, Sekretaren e Shtypit të Shtëpisë së Bardhë Karoline Leavitt dhe përfaqësuesin special amerikan Steve Witkoff. Pesë negociatorët e tjerë rusë do të përfshijnë: ndihmësin e Putinit për politikën e jashtme, Yury Ushakov, Ministrin e Jashtëm Sergey Lavrov, Ministrin e Mbrojtjes Andrey Belousov, Ministrin e Financave Anton Siluanov dhe Kirill Dmitriev, një negociator i lartë ekonomik dhe drejtues i fondit sovran të pasurive të Rusisë. Përfshirja e zyrtarëve që merren me çështje ekonomike sugjeron se temat e bisedimeve mund të shkojnë përtej luftës.

15/08/2025 13:52-Trump niset për në Alaskë, para takimit me Putinin publikon një mesazh të shkurtër: RREZIK I LARTË!!!

Presidenti amerikan, Donald Trump ka shkruar një mesazh të shkurtër, por domethënës në rrjetin social Truth Social. “RREZIK I LARTË!!!”, shkroi ai me shkronja të mëdha, gjersa po nisej nga Uashingtoni drejt Alaskës...më shumë.

15/08/2025 13:23-Pse do të takohen në bazën ushtarake Trump dhe Putin?

Vendi i takimit mes presidentit amerikan, Donald Trump dhe homologut rus, Vladimir Putinit është baza ushtarake amerikane “Joint Base Elmendorf-Richardson”, në skajin verior të Anchorage, qyteti më i populluar i Alaskës. Kjo është baza më e madhe ushtarake në Alaska dhe ka qenë një pikë kritike e mbrojtjes ajrore dhe komandës qendrore për të përballuar kërcënimet nga Bashkimi Sovjetik gjatë Luftës së Ftohtë...më shumë.

15/08/2025 12:40-Deputeti ukrainas: Nuk kemi pritshmëri të larta për bisedimet Trump-Putin

Oleksandr Merezhko, deputet ukrainas dhe kryetar i komitetit parlamentar për punët e jashtme, thotë se nuk ka "pritshmëri të mëdha" para takimit të sotëm mes Trumpit dhe Putinit. Merezhko thotë se samiti në Alaskë është "më parë një fitore diplomatike" për presidentin rus, Vladimir Putin. Trump e ka nxjerrë atë "në qendër të vëmendjes", thotë Merezhko. “Nuk pres rezultate konkrete për arsye të thjeshtë që Putini nuk dëshiron të ndalojë luftën. Qëllimi i tij është të shkatërrojë Ukrainën, dhe Trump nuk duket i prirur të vendosë sanksione ndaj Rusisë dhe atyre që e mbështesin atë,” thotë deputeti ukrainas.

15/08/2025 11:58-Ish-kreu i shërbimit inteligjent britanik: Nëse sot merren vesh Trump dhe Putin, lajm shumë i keq për Ukrainën

Ish-kreu i shërbimit të inteligjencës britanike MI6, Sir John Sawers, ka komentuar mbi rëndësinë dhe rreziqet potenciale të një marrëveshjeje për paqe që mund të dalë nga takimi i sotëm në Alaska, duke paralajmëruar se një zhvillim i tillë mund të përfaqësojë një lajm të keq për Ukrainën. Në një intervistë për Sky News, Sawers theksoi se është i kujdesshëm në lidhje me pritshmëritë për rezultatin e këtij takimi dhe shprehu shqetësim të thellë për ndikimin që një marrëveshje e papritur ose e pakoordinuar mund të ketë mbi të ardhmen e Ukrainës...më shumë.

15/08/2025 11:22-Putin niset për SHBA

Presidenti i Federatës Ruse, Vladimir Putin, është nisur drejt Shteteve të Bashkuara për samitin historik me presidentin amerikan, Donald Trump, i cili pritet të mbahet në Alaskë. Ai shihet se po shoqërohet me masa të rrepta sigurie dhe një autokolonë të blinduar që ka tërhequr vëmendjen e mediave dhe publikut....më shumë.

15/08/2025 10:38-Kancelari gjerman ka një mesazh për Putinin para takimit me Trumpin

Rusia duhet të pranojë një armëpushim me Ukrainën kur presidenti rus, Vladimir Putin të takohet me homologun amerikan, Donald Trump në Alaskë, deklaroi kancelari gjerman Friedrich Merz përpara këtij takimi historik. Merz tha se takimi mes Trumpit dhe Putinit përfaqëson një “mundësi” për paqe dhe i bëri thirrje diktatorit rus të heqë dorë nga të gjitha parakushtet për një armëpushim dhe më pas të takohet me homologun ukrainas, Volodymyr Zelensky...më shumë.

15/08/2025 09:59-Ukraina sulmon ashpër portin rus, në ditën kur takohet Trump dhe Putinin

Ushtria ukrainase njoftoi se ka kryer një sulm të suksesshëm në portin rus Olja, i cili ndodhet në rajonin e Astrahanit, në jug të Rusisë. Ky sulm u realizua gjatë mbrëmjes së të enjtes dhe ka shkaktuar dëme të konsiderueshme, duke goditur një anije që transportonte pajisje ushtarake të rëndësishme.

15/08/2025 09:38-Lavrov në Alaskë, provokon me veshjen

Kreu i Ministrisë së Jashtme ruse, Sergey Lavrov, u shfaq në Alaska i veshur me një pulovër me mbishkrimin "USSR" (Bashkimi Sovjetik). Ministri i Jashtëm i Putinit gjithashtu kërkoi të mos bëheshin parashikime dhe shprehu shpresën se Putini dhe Trumpi do të vazhdojnë "bisedën shumë të dobishme". "Ne e dimë që kemi një argument. Ne kemi një qëndrim - të qartë dhe të përcaktuar mirë. Ne do ta paraqesim atë", tha Lavrov.

 

15/08/2025 09:31-Shtëpia e Bardhë njoftoi orarin e takimit midis Trump dhe Putin

Në orën 06:45 sipas kohës së Amerikës Lindore (11:45 sipas kohës në Kosovë), presidenti amerikan, Donald Trump duhet të largohet nga Shtëpia e Bardhë për në Anchorage, Alaskë, ku do të zhvillohen bisedimet. Trump dhe Putin janë planifikuar të fillojnë bisedimet rreth orës 11:00 sipas kohës lokale (21:00 sipas kohës në Kosovë). Ata do të takohen privatisht, me praninë vetëm të përkthyesve të tyre. Presidenti amerikan planifikon të largohet nga Anchorage dhe të kthehet në Shtëpinë e Bardhë rreth orës 17:45 sipas kohës lokale të Alaskës (03:45 sipas kohës sonë).

15/08/2025 09:30-Shtëpia e Bardhë ul pritshmëritë para takimit Trump-Putin

Trump dhe Putin, të cilët do të takohen për herë të parë ballë për ballë pas gjashtë vjetësh, dhe vetëm në shoqërinë e përkthyesve të tyre, do të përpiqen të shohin nëse ka një mënyrë për të ndalur luftën në Ukrainë. Trump ka thënë se do t’i bëhet e qartë brenda disa minutash nëse ka mundësi për një marrëveshje. Në takimin nuk do të diskutohet për një marrëveshje përfundimtare paqeje për Ukrainën – e cila, sipas deklaratave të mëparshme të Trumpit, mund të përfshijë ndarjen e territoreve – propozim që presidenti ukrainas, Volodimir Zelensky deri tani e ka refuzuar fuqishëm. Nga Shtëpia e Bardhë bëjnë me dije se nuk presin përparim të madh, duke e përshkruar takimin si një “dëgjim” në vend të negociatave serioze.

15/08/2025 09:00-Protesta në mbështetje të Ukrainës në Alaskë

Protestuesit kanë dalë në mbështetje të Ukrainës në Anchorage përpara samitit Trump-Putin. Njerëzit mund të shihen duke valëvitur flamuj ukrainas dhe duke shpalosur një banderolë të madhe me fjalët "Alaska qëndron me Ukrainën".

15/08/2025 08:30-Po sikur të ngrihen tani vijat e frontit?

Aleatët evropianë të Ukrainës po sugjerojnë që negociatat të nisin nga vijat aktuale të frontit – një ndryshim i tonit, pasi më parë refuzonin çdo kontroll rus mbi territore të pushtuara. Me rikthimin si president i SHBA-së, Donald Trumpit, qëndrimi është zbutur, duke pranuar mundësinë e ngrirjes së konfliktit. Ndërkohë, Rusia po bën përparime strategjike. Putin po fiton kohë me diplomaci të ngadaltë, ndërsa samiti në Alaska është zbutur nga një përpjekje për paqe në një thjesht "dëgjim". Për Ukrainën, më e mira do ishte që Trump të refuzojë menjëherë marrëveshjen dhe të vendosë sanksione ndaj Indisë dhe Kinës. Por marrëdhënia e tij e paqartë me Putinin rrit rrezikun që takimi të mos jetë në favor të Ukrainës.

15/08/2025 08:00-Po zonat e tjera të pushtuara?

Disa keqkuptime rreth takimit të dërguarit të posaçëm të presidentit amerikan, Donald Trump, Steve Witkoff në Kremlin lidhen me idenë nëse Vladimir Putin ishte tërhequr nga objektivat maksimaliste në luftë dhe ishte gati për armëpushim vetëm në këmbim të Donetskut. Por ai ka kërkuar gjithmonë shumë më tepër. Kushtetuta ruse madje ka përfshirë në territorin e saj katër rajone të pushtuara pjesërisht të Ukrainës, duke përforcuar narrativën e rreme se Ukraina është historikisht pjesë e Rusisë. Rusia kontrollon shumicën e Donetskut dhe pothuajse gjithë Luhanskun, por vetëm rreth dy të tretat e Khersonit dhe Zaporizhzhias, ku pjesë të Khersonit u çliruan në fund të vitit 2022. A do pranonte Putin që pjesët e kontrolluara nga Ukraina të Khersonit dhe Zaporizhzhias të mbeten nën kontrollin e Kievit? Ende nuk dihet. Por për Ukraina-n, dorëzimi i këtyre territoreve do të ishte i papranueshëm, sepse do të nënkuptonte humbjen e sipërfaqeve të mëdha dhe qytetit të rëndësishëm të Zaporizhzhias. Volodymyr Zelensky ka paralajmëruar se çdo territor i dorëzuar do të përdorej nga Rusia për pushtime të tjera, ashtu si ndodhi me Krimenë në 2014, që më pas u bë bazë për luftën e vitit 2022.

15/08/2025 07:30-Si mund të duket një "shkëmbim" mes Ukrainës dhe Rusisë?

Do të ishte politikisht toksike për Volodymyr Zelenskyn e Ukrainës të urdhëronte dhjetëra mijëra civilë dhe ushtarë të largoheshin vullnetarisht nga rajoni i Donetskut. Shumë prej tyre mund të refuzonin. Elementët praktikë të kësaj do të ishin të pamundur – evakuimi i dhjetëra mijëra civilëve brenda ditëve apo javëve, për t’iu përshtatur afatit të një marrëveshjeje paqeje të formuluar gjatë një ofensive verore ruse, ku forcat e Moskës po fitojnë terren. Ka pak mundësi të qarta për Moskën që të bëjë ndonjë lëshim në këmbim. Ata kontrollojnë pjesë të vogla toke pranë kufirit në veri – afër Sumyt dhe Kharkivit – të cilat Kremlini i quan “zona tampon” dhe janë rezultat i inkursioneve jo fort të suksesshme, të dizajnuara për të lodhur fuqinë punëtore të Ukrainës. Por këto janë të vogla dhe, siç theksojnë zyrtarët ukrainas, gjithashtu janë pjesë e Ukrainës, jo e Rusisë. Prandaj nuk përbëjnë një “shkëmbim” të qartë apo të barabartë.

15/08/2025 07:00-Çfarë po kërkon Putini?

Një propozim, elemente të të cilit janë bërë publike gjatë javës së fundit dhe që thuhet se iu paraqit të dërguarit special amerikan, Steve Witkoff në Moskë, parashikon që Ukraina të heqë dorë nga pjesa e mbetur e rajoneve lindore të Donetskut dhe Luhanskut – të njohura së bashku si Donbasi – në këmbim të një armëpushimi. Por këtë javë situata në Donetsk është përkeqësuar ndjeshëm, me forcat ruse që kanë bërë përparime të rëndësishme në verilindje të Dobropilias, duke ndryshuar kontrollin në zonën për të cilën Witkoff po diskuton me Kremlinin. Kievi e ka minimizuar situatën, duke e cilësuar si depërtime nga grupe të vogla ruse, por ka dërguar përforcime. Ndërkohë, burime të tjera ukrainase në terren paraqesin një pamje më shqetësuese, duke thënë se muaj me presion të vazhdueshëm rus kanë krijuar një pikë të dobët që tani po shfrytëzohet.

15/08/2025 01:00-Ku dhe kur do të nisë takimi Trump-Putin

https://www.youtube.com/watch?v=Z_IHLTvunlM Presidentët pritet të takohen në Anchorage të Alaskës. Nuk është njoftuar ende një vend i saktë, por CNN raporton se takimi do të zhvillohet në bazën ushtarake Elmendorf-Richardson. Samiti Trump-Putin është planifikuar për të premten, më 15 gusht. Kremlini tha se do të fillojë në orën 11:30, Alaskë (21:30 Kosovë), megjithëse Shtëpia e Bardhë ende nuk e ka konfirmuar.

15/08/2025 00:30-Deputeti ukrainas nuk ka pritshmëri të mëdha nga takimi Trump-Putin

Një deputet ukrainas ka thënë për Sky News se ai "nuk ka pritshmëri të mëdha" përpara takimit të Donald Trump me Vladimir Putin që do të zhvillohet nesër në Alaskë. “Kemi përjetuar emocione të ngjashme pesë a gjashtë herë më parë, kur Trump ka paralajmëruar kontakte personale me Putinin”, tha Andrii Osadchuk. “Të gjitha këto përpjekje nuk sollën asgjë, asgjë fare. Pas çdo bisede telefonike, Putini lëshonte raketa mbi Kievin dhe qytete të tjera ukrainase”, deklaroi ai.

15/08/2025 00:00-Nga Jalta dhe Mynihu deri në Alaskë - marrëveshjet sekrete të fuqive të mëdha që shkruan fatet e popujve evropianë

Takimi i ardhshëm midis presidentit amerikan, Donald Trump dhe homologut rus, Vladimir Putin në Alaskë ka shkaktuar shqetësim të thellë në një pjesë të opinionit publik evropian, veçanërisht në pjesën lindore të kontinentit. Megjithëse paraqitet në mënyrë formale si një takim diplomatik mes dy fuqive botërore me qëllim “zgjidhjen e çështjeve kyçe ndërkombëtare”, në shumë kryeqytete të Evropës kjo ngjarje shihet si një përsëritje e mundshme e momenteve më të errëta të shekullit të XX-të – Konferenca e Mynihut e vitit 1938 dhe Samiti i Jaltës i vitit 1945...më shumë.

14/08/2025 23:20-Kongresisti amerikan thotë se Trump po përpiqet të “blejë pak kohë” duke takuar Putinin

Donald Trump po përpiqet të fitojë pak kohë duke u takuar me Vladimir Putinin. Kështu mendon kongresisti demokrat, Mike Quigley, bashkëkryetar i Grupit të Kongresit për Ukrainën, i cili më tutje deklaroi se Trump "i është nënshtruar" presidentit rus. "Pse nuk është Zelensky aty tani? Pse presidenti [Trump] ka lejuar që të kalojnë gjashtë afate?", pyeti ai. "Mendoj se ajo që po shihni këtu është përpjekja e presidentit [Trump] për të fituar pak kohë", shtoi Quigley.

14/08/2025 22:40-Trump shmang përgjigjen për uljen e numrit të trupave të NATO-s në Poloni

Trump u pyet nëse do të mbështeste idenë e uljes së numrit të trupave të NATO-s në Evropë, në vende si Polonia, me kusht që Rusia të pranonte një marrëveshje paqeje me Ukrainë? “Do ta mendoj atë më vonë. Nuk më është paraqitur ende”, deklaroi shkurt Trump.

14/08/2025 22:00-Kush do ta shoqërojë Putinin në takimin me Trumpin - delegacioni tregon agjendën e mundshme të takimit në Alaskë

Kremlini ka njoftuar se cilët zyrtarë do të shoqërojnë presidentin rus, Vladimir Putin në samitin e parë mes udhëheqësve të SHBA-së dhe Rusisë që nga viti 2021. Presidenti amerikan, Donald Trump do ta takojë në Alaska homologun rus, në një përpjekje për t’i dhënë fund luftës në Ukrainë...më shumë.

14/08/2025 21:20-"Nuk i kam parë fëmijët e mi ka gjashtë vite", lirohen ukrainasit e burgosur në Rusi

Sot, 84 ukrainas - 51 civilë dhe 33 ushtarakë - u kthyen nga robëria ruse. Mes tyre janë njerëz të mbajtur që nga vitet 2014, 2016 dhe 2017, si dhe mbrojtës të Mariupolit...më shumë.

14/08/2025 20:40-Çfarë ndodhi herën e fundit kur u takuan Trump dhe Putin

Presidenti i SHBA-së, Donald Trump dhe homologu rus, Vladimir Putin, janë takuar kokë më kokë dy herë më parë. Në vitin 2017, ata u takuan vetëm gjatë takimit të tyre të parë në samitin G20 në Hamburg, Gjermani. Më pas në vitin 2018, ata u ulën kokë më kokë në Helsinki, Finlandë, pas së cilës Trump mbështeti Putinin kundrejt agjencive amerikane të inteligjencës në çështjen e ndërhyrjes ruse në zgjedhje. Trumpi u përball me një valë të ashpër zemërimi bipartisan — dhe me një dënojmë globale. Ishte një nga rastet e rralla gjatë presidencës së Trumpit kur ai pranoi një gabim, duke thënë pas kthimit në Shtëpinë e Bardhë se “kuptova se ka nevojë për disa sqarime” rreth deklaratave të tij në Helsinki.

14/08/2025 20:08-Trump do të ftojë udhëheqës evropianë në takimin Zelensky-Putin

Presidenti amerikan, Donald Trump është pyetur rreth takimit me homologun Vladimir Putin dhe nëse është i gatshëm t’i ofrojë lideri rus qasje në minerale të rralla për ta nxitur atë të përfundojë luftën në Ukrainë. “Do të shohim çfarë ndodh, kemi një takim të madh. Mendoj se do të jetë shumë e rëndësishme për Rusinë, dhe do të jetë shumë i rëndësishëm për ne që do të shpëtojmë shumë jetë”, pohoi ai...më shumë.

14/08/2025 19:44-Kur Rusia ia shiti Amerikës Alaskën?

https://www.youtube.com/watch?v=3lUoyOl31_E Më 1867, një transaksion i jashtëzakonshëm e ka ndryshuar hartën e Amerikës së Veriut: Rusia ua ka shitur Shteteve të Bashkuara territorin e Alaskës për 7.2 milionë dollarë. Përtej përfshirjes në shumë mite, legjenda apo thashetheme ndër breza, kjo ka qenë një marrëveshje prej të cilës kanë përfituar të dyja palët....më shumë.

14/08/2025 19:19-Cilin territor e kontrollon Rusia?

Rusia aktualisht kontrollon pak më shumë se 18 për qind të Ukrainës. Presidenti ukrainas, Volodymyr Zelensky ka deklaruar se nuk do të heq dorë nga territori , edhe nëse arrin marrëveshje Trumpi me Putinin.

14/08/2025 18:47-Rusia humb një aeroplan Su-30SM pranë Ishullit të Gjarprit në Ukrainë

Marina ukrainase ka raportuar se një aeroplan luftarak rus i tipit Su-30SM është rrëzuar gjatë një misioni në rajonin juglindor të Ishullit të Gjarprit, në Detin e Zi. Sipas informacionit të publikuar, ngjarja ndodhi gjatë një operacioni ajror, por shkaku i rrëzimit mbetet ende i panjohur...më shumë.

14/08/2025 18:40-Macron: Trump i hapur për garanci sigurie për Ukrainën

Presidenti francez, Emmanuel Macron ka deklaruar se homologu amerikan, Donald Trump ka ofruar garanci sigurie për Ukrainën. Trump zhvilloi një telefonatë dje me liderë evropianë, përfshirë presidentin ukrainas, Volodymyr Zelenskyn, përpara takimit të tij me presidentin rus, Vladimir Putin. Macron shtoi gjithashtu se Trump e kishte përjashtuar qartë mundësinë që Ukraina t’i bashkohet aleancës NATO, diçka që përbën një pengesë kryesore në çdo marrëveshje paqeje me Rusinë.

14/08/2025 18:22-Aeroplani qeveritar rus arrin në Alaska

Një aeroplan qeveritar rus ka zbarkuar në Alaska përpara takimit të nesërm Trump-Putin. Aeroplani u nis nga Moska dhe u ul në Aeroportin Ndërkombëtar të Anchorage.

14/08/2025 18:02-Trump flet para samitit me Putinin në Alaskë: Nëse takimi shkon keq, nuk do ta telefonojë askënd

Donald Trump ka folur gjithashtu për takimin me Vladimir Putinin. Presidenti amerikan mendon që homologu rus do të bëjë një marrëveshje ndërsa tha se kërcënimi me sanksione ndoshta ka luajtur një rol në organizimin e takimit...më shumë.

14/08/2025 18:00-SHBA ia lehtëson pesë ditë sanksionet Putinit

Departamenti i Thesarit të Shteteve të Bashkuara të Amerikës njoftoi se gjatë periudhës nga 15 deri më 20 gusht 2025, të gjitha operacionet dhe aktivitetet që lidhen me përgatitjen dhe zhvillimin e takimit midis presidentit amerikan, Donald Trump dhe homologut rus, Vladimir Putin në Alaskë, do të përjashtohen nga masa ndëshkuese dhe sanksionet ekonomike të vendosura më parë.

14/08/2025 17:59-Pesë parimet që udhëheqësit evropianë i vendosën Trumpit para takimit me Putinin

Para takimit me presidentin rus, Vladimir Putinin në Alaska, presidenti amerikan, Donald Trump mori pjesë në një video-takim me udhëheqësit evropianë. Sipas kancelarit gjerman, Friedrich Merz pala evropiane i paraqiti liderit amerikan pesë parime para bisedimeve të së premtes...më shumë

14/08/2025 17:58-Putin foli në prag të takimit historik në Alaska

Presidenti rus, Vladimir Putin, deklaroi të enjten se Shtetet e Bashkuara të Amerikës po ndërmarrin masa për të ndalur luftën në Ukrainë, gjatë një takimi me zyrtarët më të lartë rusë, në prag të samitit që do të mbahet të premten në Alaskë me presidentin amerikan, Donald Trump. Para udhëtimit për në Alaskë, Putin kryesoi një takim ku morën pjesë anëtarët e ekipit negociator që do ta shoqërojë në samit, përfshirë ministrin e jashtëm Sergey Lavrov, me qëllim që t’i informonte për “rrjedhën e procesit të negociatave mbi krizën në Ukrainë”...më shumë.