Sipas raportimeve të fundit nga Foot Mercato, Olympique de Marseille ka nisur bisedimet me Lille OSC për transferimin e sulmuesit anësor kosovar, Edon Zhegrova.
Për këtë është pyetur, Roberto De Zerbi, trajneri i Marseille, i cili foli shkurt, duke njohur cilësitë e lojtarit, por tutje shtoi se kur të vijë në Marseille, do të flas më gjatë.
"Nuk është një nga lojtarët e mi. Nuk mund të flas për të. Është një lojtar i fortë, por këtë e dinim të gjithë. Nëse bëhet lojtar i Marseille, do t’ju jap mendimin tim", deklaroi De Zerbi.
Të premten, presidenti i Lille, Olivier Létang, kishte deklaruar se Zhegrova mund të qëndronte në klub edhe për sezonin aktual, ndërsa të hënën ai u rikthye në stërvitje me skuadrën, duke i dhënë mundësinë të luante para se të largohej si lojtar i lirë verën e ardhshme.
Sipas burimeve të afërta me negociatat, Marseille ka propozuar një huazim me detyrim blerjeje për rreth 20 milionë euro.
Vetë Zhegrova raportohet se është i motivuar për t’iu bashkuar gjigantit francez, i cili këtë sezon do të garojë në Ligën e Kampionëve.
Për lojtarin ka interes edhe nga disa klube të Ligës Premier, por asnjëra nuk ka bërë hapa konkretë drejt transferimit. /Telegrafi/
