Çmimi i vendosur nga Paris Saint-Germain për Gianluigi Donnarumman mbetet një pengesë e madhe për Manchester Cityn.
Sipas gazetarit italian Alfredo Pedulla, kampionët e Francës kërkojnë plot 50 milionë euro për kartonin e portierit italian, shumë që konsiderohet më e lartë sesa City është i gatshëm të paguajë.
Pavarësisht kësaj diference, negociatat mes dy klubeve po vazhdojnë. Drejtuesit e Cityt e shohin Donnarumman si një alternativë afatgjatë për portën, ndërsa PSG-ja po kërkon të përfitojë maksimalisht nga shitja e tij, duke marrë parasysh situatën kontraktuale të lojtarit.
Në ndeshjen e fundit të PSG-së kundër Angers, Donnarumma nuk u aktivizua dhe pas përfundimit të takimit u përshëndet me tifozët.
Sipas mediave franceze, ky gjest u interpretua si një lamtumirë emocionale nga lojtari që sezonin e kaluar ndihmoi klubin parizien të fitonte për herë të parë në histori Ligën e Kampionëve.
Kontrata e Donnarummas me PSG-në skadon në verën e vitit 2026, por drejtuesit e klubit janë të etur që ta shesin atë tani.
Arsyeja kryesore lidhet me balancimin e financave dhe respektimin e rregullave të Fair Play-it Financiar, pasi klubi synon të rinovojë skuadrën me disa afrime të reja.
Manchester City, nga ana tjetër, është i kujdesshëm në bisedime. Pep Guardiola kërkon një portier me eksperiencë ndërkombëtare, por drejtuesit nuk janë të gatshëm të paguajnë shifrën e kërkuar nga PSG. Pritet që në javët në vijim të diskutohet mundësia e një uljeje çmimi ose përfshirja e një lojtari në marrëveshje.
Donnarumma, i cili është vetëm 26 vjeç, mbetet një nga portierët më të vlerësuar në botë.
Ai është pjesë e kombëtares së Italisë që fitoi Kampionatin Evropian në vitin 2021 dhe konsiderohet ende si një nga lojtarët më të rëndësishëm të brezit të tij. Për Cityn, transferimi i tij do të ishte një investim afatgjatë në portë.
Megjithatë, gjithçka do të varet nga gatishmëria e PSG-së për të bërë lëshime në kërkesat financiare.
Nëse parisienët insistojnë në 50 milionë euro, atëherë mundësia e transferimit do të zvogëlohet ndjeshëm, duke e bërë situatën një nga telenovelat më të ndjekura të merkatos së verës. /Telegrafi/
