Ardon Jashari pritet të mbërrijë sonte në Itali për t’iu nënshtruar vizitave mjekësore me Milanin gjatë 24-48 orëve të ardhshme, pasi është arritur marrëveshja mes klubit italian dhe Club Brugge për një shumë të raportuar prej 39 milionë eurosh plus bonuse. Struktura e marrëveshjes ka pësuar ndryshime të rëndësishme në format dhe afatet e pagesës.
Përparimi i madh u arrit mbrëmjen e kaluar, me palët që finalizuan marrëveshjen pasi Milani pranoi të rrisë pjesën fikse të tarifës krahasuar me shtesat. Kostoja përfundimtare e operacionit mbetet rreth 39 milionë euro, e ndarë në katër vite në vend të pesë.
Sipas Calciomercato.com, marrëveshja fillestare përfshin 34 milionë euro pagesë fikse dhe pesë milionë euro në formë bonusesh të lidhura me paraqitjet dhe objektivat sportive.
Jashari ka nënshkruar prej disa javësh një kontratë pesëvjeçare me Milanin, me një pagë prej 2.5 milionë euro në sezon dhe me mundësi rritjeje të saj.
Lojtari pati një rol vendimtar në përfundimin e marrëveshjes, duke refuzuar oferta më të larta financiarisht – përfshirë një nga skuadra e pasur Neom – për të realizuar ëndrrën e tij të hershme për të luajtur te “Rossonerët”.
Ai njihet si tifoz i Milanit që prej fëmijërisë, kur kishte vizituar San Siron, dhe ka qenë një nga lojtarët kyç të Club Brugge, ku ndihmoi klubin të fitonte Kupën e Belgjikës në maj dhe të eliminonte Atalantën në Ligën e Kampionëve në shkurt.
Tani mbetet vetëm testi mjekësor për të përmbyllur transferimin. Jashari pritet të mbërrijë në Itali sonte dhe do t’i nënshtrohet ekzaminimeve mjekësore gjatë ditës së nesërme, të mërkurën. /Telegrafi/
