Kombëtarja e Kosovës ka pësuar humbje të thellë me rezultat 4-0 në udhëtim ndaj Zvicrës, në kuadër të ndeshjes së parë kualifikuese për Kupën e Botës 2026.
Pas përfundimit të këtij dueli kapiteni Amir Rrahamni tha se problemet me ‘topin e dytë’ bën që Kosova të pësojë disfatë të thellë nga Zvicra.
“Realisht, Zvicra i shfrytëzoi rastet që i pati pas gabimeve tona. Të gjitha rastet ndodhën në pjesën e parë. Që nga minuta e parë nuk arritëm ta fitonim topin e dytë, gjithmonë e fitonin ata”.
“Prej aty nisnin aksionet e tyre, dhe ne u tërhoqëm shumë prapa. Nuk ishim të kujdesshëm. Të gjitha rastet ishin pothuajse të njëjta, topi i dytë i humbur”.
Rrahmani në fund foli edhe për lëndimin e pësuar që e detyroi atë të largohet nga fusha para kohës, si dhe për duelin e radhës ndaj Suedisë pas tri ditësh.
“Nesër do të bëjmë rezonancën për të parë se çfarë është. Duhet ta harrojmë sa më shpejt këtë ndeshje, t’i marrim nga ajo vetëm gabimet që kemi bërë dhe t’i përmirësojmë, duke u përgatitur për ndeshjen kundër Suedisë”, përfundoi ai./Telegrafi/
