Paris Saint-Germain ka zyrtarizuar transferimin e portierit 23-vjeçar Lucas Chevalier nga Lille.
Portieri francez ka nënshkruar një kontratë pesëvjeçare, që do ta mbajë në klub deri në vitin 2030.
Tarifa e transferimit raportohet të jetë rreth 40 milionë euro, me bonuse të mundshme deri në 15 milionë euro. Chevalier, produkt i akademisë së të rinjve të Lille, u shpall 'Portieri i Vitit' në Ligue 1 për sezonin 2024/2025 dhe u përfshi në formacionin më të mirë të sezonit.
Ardhja e Chevalier sinjalizon një ndryshim në strategjinë e PSG-së për portën dhe hedh dyshime mbi të ardhmen e portierit aktual titullar Gianluigi Donnarumma, bisedimet për rinovimin e kontratës së të cilit raportohet se kanë ngecur.
Disa klube të mëdha europiane, përfshirë Manchester United, Chelsea dhe Inter Milan, thuhet se janë të interesuara për Donnarumman.
“Jam një djalë që po jeton ëndrrën e tij. Që i vogël kam dashur të luaj në nivelin më të lartë”.
“Dua të falënderoj presidentin Nasser Al-Khelaifi, Luis Campos, trajnerin Luis Enrique, gjithë stafin teknik dhe të gjithë ata që punuan fort për të më sjellë te Paris Saint-Germain".
“Jam shumë i lumtur që jam këtu. Do ta vesh këtë fanellë me pasion dhe ambicie”, ka thënë Chevalier pas prezantimit./Telegrafi/
